Footbridge ang nahuman na sang DPWH karon nga gina-demolish ang nagasablag nga overflow sa Kabiguan Creek sa Barangay Pahanocoy sa Bacolod City.
Malapit na matapos sang katapo sang City Engineer’s Office ang pag-demolish sang overflow nga naga-sablag sa ilig sang tubig sa Kabiguan Creek sa Barangay Pahanocoy.
Bangud wala sang maagyan ang malapit 30 ka mga pamilya nga sadto anay naga-alagi sa overflow, ginhimuan sila sang DPWH sang temporary nga footbridge nga sarang maagyan.
Ginalauman ni Councilor Psyche Marie Sy, pamuno sang Committee on Public Works sang konseho nga paagi sa pag-demolish sang illegal structure mapahagan-hagan na ang pagbaha sa malapit nga mga purok nga nasakpan sang Barangay Pahanocoy kag Sum-ag.
Ang City Engineer’s Office ang madasun nga magapatuman sang declogging operation sa mga drainage sang Bangga Tomaro kag Bangga Aning sa Pahanocoy.
Separado man nga magapatuman sang drainage construction project ang DPWH sa tuyo nga masolbar ang malawig nga problema sa baha sa amo nga lugar kada tig-ululan.