Naglab-ot sa 97 ang mga nabiktima sang palupok sang nagligad nga tuig sa probinsya sang Negros Occidental. Walo diri ang gikan sa Bacolod base sa record sang Bacolod City Health Office.
Tuyo sang Department of Health upod sa Bureau of Fire Protection nga mapahagan-hagan ang kadamuon sang mga firecracker related incidents kag ang mapaiway ang disgrasya sa pagsaulog sang Paskwa kag bag-ong tuig.
Gani sa mismo baligyaan sang mga palupok sa reclamation area ginlunsar sang DOH, BFP upod ang PNP, DTI kag local officials ang Oplan Iwas Paputok agud mas mapabaskog ang kampanya batuk sa pag-gamit sang iligal nga palupok kag pyrotechnics.
Kabahin sa mga ginadumilian nga palupok ang watusi, piccolo, super lolo, boga kag iban pa nga sahi sang illegal kag imported nga palupok kag pyrotechnics.
Padayon nga ginahaylo sang mga otoridad ang paggamit sang mga safe nga pamaagi sa pagsug-alaw sang bag-ong tuig pareho na lamang sang pag-gamit sang torotot kag pagtan-aw sang community fireworks display kaupod ang pamilya.