Siudad sang Bacolod handa nga maghatag bulig pinansyal para may masayluhan nga opisina ang COMELEC-Bacolod nga liwat nga ginbaha.
Bisan ang opisina sang Comelec-Bacolod sa Bays Center sa Bacolod ang wala man makaluwas sa baha sa pagbunok sang ulan humalin sang nagligad nga weekend.
Nalab-ot man sang tubig baha ang mga lamesa kag iban pa nga office equipment. Natabuan nga sa mall ginpatuman sang Comelec ang filing sang certificate of candidacy para sa mga magakandidato sa Barangay kag SK elections.
Suno kay Comelec-Bacolod Election Officer Atty. Kathrina Trinio-Caña ila pa iga-assess kun may mga importante nga dokumento nga naapektuhan sang baha.
Ginsiling naman ni Secretary to the Mayor Atty. Karol Joseph Chiu, ginaplano sang siudad nga masaylo ang opisina sang Comelec sa Bacolod City Government Center sa tiun nga matukod na ang ginaplano nga Legislative Building.
Handa man ang siudad nga maghatag sang bulig pinansyal kun may lugar nga makita ang Comelec para temporaryo nga masayluhan.