Sa pihak sang Regional Secondary Price Cap nga ginapatuman sang Energy Regulatory Commission sa Visayas kag Mindanao, tres sentimos lamang ang ginapaabot nga iban sa sukot sang kuryente sang Negros Electric and Power Corporation sa mga Negros.
Ini bangud suno sa Negros Power, ang Wholesale Electricity Spot Market ukon WESM lamang ang sakop sang amo nga mando sang ERC.
Sa Press conference sini nga adlaw, ginsiling ni Engr. Joe-mel Zaporteza, Vice President kag Chief Operating Officer sang Negros Power, may tatlo sila ka mga ginakuhaan sang suplay sang kuryente kag 23 percent lamang diri ang gikan sa WESM.
Bangud sini, may pagnubo gid man sa sukot sa bulan sang Setyembre apang yara lang ini sa 3 centavos.
14.2487 pesos per killowatt hour ang residential rate sa Setyembre base sa calculation sang Negros Power.
Dugang ni Zaporteza, kun magpadayon pa ang pagnubo sang suplay, ginapaabot man nga magsaka sa gihapon ang sukot sa kuryente bisan pa may regional secondary price cap.
Sini nga adlaw, liwat nga ginpaidalum sa red kag yellow alert ang Visayas Grid.
Yara sa yellow alert ang grid humalin las 3 tubtob las 5 sang hapon, kag humalin las 6 tubtob las 9 sang gab-i. Samtang red alert naman ini las 5 tubtob las 6 sang hapon.
Ini bangud yara lang sa 2,847 megawatts ang available nga power supply sa Visayas grid kag yara sa 2,550 megawatts ang peak sa demand sang kuryente sa amo nga mga oras.
Sa karun, wala pa sa gihapon nagbukas ang pila ka mga dalagko nga planta sa Visayas, rason nga kulang sa gihapon ang suplay sang kuryente.
[sibwp_form id=1]