Humalin Enero tubtob Abril 26, may napulo ka Covid-related deaths ang na-record sang Negros Occidental.
Suno kay OIC-Provincial Health Officer, Dr Girlie Pinongan ang 10 covid related deaths mahimo naga lakip sang mga spill-over gikan sa 2022 bangud nga ulihi lang na report.
Suno kay Negros Occidental Governor Eugenio Jose Lacson, indi man makabig nga maka alarma ang kadamuon sang Covid related deaths sa probinsya, pero labing gina tinguhaan nga malikawan ini.
Padayon ang paghaylo sa publiko nga mag pabakuna para mapangapinan ang kaugalingon kontra Covid.
14 ang na record nga new Covid cases sang Negros Occidental sa April 27 nga report sang Provincial Incident Management Team. 81 ang active cases.
Samtang, masobra sa 222,000 naman ang target sang Negros Occidental nga mabakunahan para sa Measles Rubella Supplemental Immunization Activity sa idalom sang Department of Health.
Para sa bilog nga bulan sang Mayo sa supplemental immunization activity, 222,590 ka mga kabataan nga naga pang edaron 9 months tubtob 59 months ang target nga madapatan sang measles rubella vaccination.
Ini base sa datus nga gin pa gwa sang PHO.
Para naman sa Oral Polio Vaccination target ang zero to 59 months old nga mga kabataan. Ang banwa sang Binalbagan, Pulupandan, EB Magalona kag Kabankalan City ang nalakip sa mga priority areas para sa vaccine allocation.