Gin-aprobahan sang Sangguniang Panlalawigan sang Negros Occidental ang resolution nga naga paidalom sang probinsya sa state of calamity.
Romeo Subaldo photo
Ginsiling ni Negros Occidental Governor Eugenio Jose Lacson nga isa sa mahimo mangin basehan amo nga kun may duha ka LGU sa probinsya nga nag deklarar sang state of calamity.
Sa November 6, 5pm nga report sang PDRRMO, ang La Carlota City, kag mga banwa sang Toboso, La Castellana kag San Enrique ang na paidalum na sa state of calamity.
Ginsiling naman ni Himamaylan City Vice Mayor Justin Gatuslao nga na aprobahan man sang SP, Hwebes sang hapon ang declaration sang State of Calamity sang siudad.
Nalakip ang Negros Occidental sa anum ka mga probinsya sa bilog nga pungsod nga nahatagan sang Presidential Financial Assistance nga naga balor sang P50 million.
Ini nga bagay ang labing gina abi-abi kag gina pasalamatan ni Lacson nga nagsiling nga sadto pa man madasig mag release sang bulig si Presidente Ferdinand Marcos, Jr.
49 ang patay sa Negros Occidental kag 52 missing sa 5pm nga report sang Provincial Disaster Risk Reduction Management Office. La Castellana ang may pinaka madamo nga gin-report napatay – 12.
Wala labot sa casualties, dugang pa ni Lacson isa pa gid sa nangin basehan sang declaration amo nga tuman ang physical damages nga natuga sang bagyo Tino.
May mga lugar pa sa probinsya nga wala pa lubos mabalik ang linya sang kuryente.
Ang telecommunication lines wala pa man ma restore kag may kabudlayan pa sa karon sa communication.
May mga yara pa sa evacuation centers. 240,256 ka persona ukon 67,877 ka pamilya ang apektado bangud sang Bagyo Tino sa Negros Occidental.
Dugang pa sa report sang PDRRMO, 135,402 ka indibidual diri ang naga pabilin sa mga evacuation center kag 31,853 naman ang yara sagwa sang evacuation.
Ang 5th district ang labing apektado. Suno kay Lacson wala ginpaabot ang natabo. Paathag niya, ang trajectory sang bagyo Tino sa norte nga bahin sang probinsya.
Tubig baha nga gikan sa Canlaon City suno sa gobernador nga nag panaog tubtob sa Binalbagan ang nag igo sa 5th district.
Ginsiling ni Office of the Civil Defense Negros Island Regional Director Donato Sermeno, III, nag patuman man sang pre-emptive evacuation pero naigo ang mga lugar nga wala gina lauman magbaha.
Apat ka mga footbridge sa linyada sang Binalbagan River ang nagkalaguba tuga sang flashflood, lakip na diri ang hanging bridge sa Inolingan sa Moises Padilla suno sa OCD.
Nag reconvene na ang Regional Inter-Agency Coordinating Cell.
Suno kay Sermeno ang Department of Information and Communication Technology ang maga butang sang starlink sa mga lugar nga ang telecommunication lines apektado.
Ginsiling man ni Lacson nga padayon ang pag padala sang bulig sang probinsya kaangay sang food packs kag assistance sa naga kinahanglan sang tubig ilimnon.