Gindayaw ni Philippine Coast Guard Commandant Admiral Ronnie Gil Gavan ang kapitan sang M/V Devon Bay na si Elimar Jucal nga taga San Enrique, Negros Occidental nga isa sa karon sa apat ka mga missing matapos maglugdang ang barko sang Huwebes, January 22 malapit sa Scarborough Shoal.
Para sa opisyal sang Philippine Coast Guard, nagpakita sang pagkabaganihan si Jucal kag wala niya gid ginpabay-an ang iya nga mga kaupdanan bisan pa yara na sa peligro ang iya kabuhi.
21 ang sakay nga crew sang M/V Devon Bay nga mga Pinoy kag duha sa ila taga Negros. 15 ang nakaluwas, duha ang napatay kag may apat pa nga missing.
Ang Thunderbugs Bacolod Motorcycle Club Inc. kun sa diin miyembro si Jucal ang nagpabutyag sang suporta kag pangamuyo para sa iya.
Para sa grupo ang iya ginpakita nga kaisog, pagpamuno kag pagkalabalaka sa iban nagapakita sang matuod-tuod nga kahulugan sang brotherhood kag pagsebisyo kay ginpili niya ang iban nga tawo sang sa iya kaugalingon gani indi siya nila malipatan.
Ginpangamuyo sang grupo ang iya pagbalik kag proteksyon gikan sa Makaako kag ang padayon nga kabaskog para sa iya pamilya.*