Ang asawa kag 10 ka tuig nga bata sang negosyante ang ginpasulod sang mga armado sa balay antes nila ginpatay sa garahe ang biktima sa Sitio Bebang, Barangay General Luna sa banwa sang Toboso, Negros Occidental Miyerkules sang gab-i.
Ang 37-anyos nga negosyante, sakay sa iya motorsiklo, ang halin sa Toboso Public Market agud mag-booking sang iya inug-pisada nga karne.
Sang mabatian sang iya bata nga babaye nga nag-abot na ang motor sang iya amay, gilayon ini nga nag-gwa kag didto iya nakit-an ang apat ka mga naka-bonnet nga persona, pila sa ila may mga bitbit nga long firearms.
Nagsunod man ang iloy pagwa sa balay kag didto nila nasaksihan ang pagbaklid sa biktima. Sila ang ginpabalik sang isa sa mga armado kag ila na nabatian ang sunod-sunod nga lupok sang pusil.
Ginsiling ni Master Sergeant Eugene Kangkee, chief investigator sang Toboso PNP, nga wala man sang kontra ukon nakabaton sang pagpamahog ang biktima, nga ginalaragway sang iya mga tupad-balay bilang isa ka malipayon kag sunluganon nga tawo.
Narekober sa crime scene ang tatlo ka empty shells sang caliber 5.56 M16, isa ka slug sang 9mm kag isa ka empty shell sang 9mm.
“As of now nagapadulong pa kami sa crime laboratory. Ang mga recovered nga pieces of evidence is amon ipa-check sa crime lab kay basi may mga dati nga nagamit na nga empty shells, basi may comparison ba. Amo na ginapa-check pa namon”, suno kay Kangkee.*
[sibwp_form id=1]