Nagsaka na sa napulo ang dengue related deaths sa Negros Occidental. Kadamuon sang dengue cases ang nagsaka naman sa masobra 244 percent.
Humalin Enero tubtob Setyembre 14, may 3,851 dengue cases ang na record sang Provincial Health Office.
Paathag ni Dr Girlie Pinongan, ang PHO, may pagnubo na kuntani sa kaso sa nagliligad nga semana ugaling nagsaka naman ini liwat mahimo nga dala man sang paniempo.
Naga pabilin ang dengue fast lanes pero indi man puno ang mga ospital. Bangud nga may evacuees sa nagliligad nga mga inadlaw isa man sa gina tutukan sang PHO ang sitwasyon sa mga evacuation center sadto.
Naga abiso naman si Pinongan nga kun may paghilanat kag makitaan sang iban pa gid nga sintoma ang pasyente kaangay sang rashes gilayon nga mag pakonsulta para temprano pa mahatagan na sang medical attention ang natungdan.
May pila sa mga napatay suno sa iya nga ulihi na nag padangat sang ila sitwasyon sa duktor kag nag develop na sang kumplikasyon.
Sa mga bag-o nga dengue related deaths nga gin-report may yara sang pareho nga bata kag adult ang napatay.
“Kun may gina batyag diretso gid dayon sa aton mga health facilities or ma pa konsulta dayon sa aton mga health workers para ma pa check ang ila mga labs bala, may mga fever, may rashes. Amo gid na i-watch out ta”, suno kay Pinongan.