National Bureau of Investigation ang maga file sang reklamo nga estafa kag identity theft batuk sa persona nga ila natumod responsable sa pag hack sang Facebook account sang isa ka government official.
Suno kay NBI Bacolod Chief Renoir Baldovino tigayon na nila nga nakilal-an ang suspek sa pag hack sang account sang isa ka government official sang Sipalay City.
Ginpadangat sa ila nga talatapan ang natabo sadtong bulan sang Marso.
Suno kay Baldovino upod man nga nagpadulong sa ila talatapan ang tatlo ka mga Facebook friends sang amo nga opisyal nga nag padala sang kwarta paagi sa GCash matapos nga gin gamit sang suspek ang identity sang opisyal para mag pangayo sang kwarta kag mag pakuno kuno nga tuman nga kinahanglan ang amo nga kantidad.
Sa kabilugan suno kay Baldovino 20,000 pesos ang napadala sang tatlo ka mga persona.
Mahimo pagkatapos na sang semana santa ma file ang reklamo nga estafa kag identity theft in relation sa cybercrime law ang ipasaka sang NBI batuk sa suspek.
Lakip naman diri ang paandam man sang NBI sa publiko nga indi basta basta mag padala sang kwarta sa mga naga solicit kun indi mapat-od personal sa natungdan.
Ginpakamaayo sang NBI nga indi pag hingadlan ang tagreklamo kasubong man ang suspek tubtob nga ma file ang mga reklamo sa Prosecutor’s Office.