Sa sini nga microphone gina hambal sang sales lady ang code sang sapatos….
Pila lang ka segundos may madagdag na nga box nga naga unod sang sapatos nga imo nga gina pangita…
Maka hilidlaw ang ini nga eksena sa mga sapatosan sa downtown sang Bacolod.
Madugay na ang ini nga sistema pero naga padayon pa.
Suno sa tag iya sang Unison Shoe Emporium nga si Cris Edward Khia sa ibabaw ang stockroom sang mga sapatosan. May tawo nga naka assign didto para magbaton sang orders.
Kun sa third floor halin ang stock may higot… Pero kun sa second floor derecho hulog.
Sa pihak nga side sang sapatosan pang lalaki, sa pihak pangbabaye kag sa tunga pang bata.
Sa sini nga mga sapatosan makita ang mga classic Pinoy brands…
Parehos na lamang ang Alex nga brand nga himo sa Marikina…
Ang halos tanan nga black shoes nga pang eskwela nga naka display diri alex ang brand.
Ang Lec Chic, isa ka Pinoy man nga brand sang slip ons nga uso pa tubtob subong.
Sino bala ang wala maka kilala sang Islander nga brand sang tsinelas? Ukon ang classic nga Spartan?
Tanan ina makita mo pa diri.
Sang ini sa sini nga panahon nga manug bukas ang klase masako kun tani ang ini nga mga sapatosan.
Masako ang lawagay sa micrphone sang code kag masako ang dagdaganay sang mga sapatos gikan sa kisame pero subong bangud online ang tanan, wala masyado sang customer.
Dako kuno ang epekto sang pandemic sa ila nga negosyo ilabi na sang nag lockdown, nagkala expire ang iban nga sapatos
Sa subong nga panahon nga uso ang pag order online, ila man ini nga gina updan. May yara man sila sang Facebook page kun sa diin ka pwede maka order. May mga taga Manila pa gani kuno nga naga order sa ila kay may mga classic nga sapatos nga diri lang makita parehos sang Robertsons.
Sadto anay pamilya ang dululongan nga naga sulod diri para mag bakal sang sapatos kag sang una, may pamaagi pa sa pag takos sang sapatos bisan indi mo upod ang masuksok.
Sa pihak sang mga pagbag-o padayon kuno nga naga survive ang ila negosyo sa sulod na sang halos lima ka dekada.
May mga loyalista sila nga diri gid ya mismo naga balik balik sa ila.
Bisan ano kuno ang matabo nga mga pagbag-o, maga pabilin ang ini nga classic nga pamaagi sa pag padala sang stocks nga ang tawag gani sang iban… Hulog ng langit!
Kay ang ini nga pamaagi ang ila pa nga gin mana sa ila nga kalolohan.