Nadugangan sang tatlo ang dengue related deaths sa Negros Occidental. Sa kabilugan, 13 na ang gin-report napatay.
Suno kay Dr Girlie Pinongan ang Provincial Health Officer, ang tatlo ka bag-o nga suspected dengue deaths sa ila nga record mga kabataan.
Wala labot nga ulihi na sila nag padulong sa duktor, may mga kumplikasyon pa gid sa ila nga mga kaso.
Sa datus sang Provincial Health Office, as of September 28, may 4,400 ka dengue cases ang na-report.
Kun ipaanggid sa kasubong nga tion sang 2023, 272.57 percent ini nga mas mataas.
Sa mga lgu ang siudad sang Bago ang may pinaka madamo nga gin-report nga kaso, 437 cases.
Suno kay Pinongan, kun basehan ang kada semana nga reporting, makit-an man nga amat-amat na ang pagnubo sang kaso.
Padayon ang ila nga panawagan nga mag mangin matinlo sa palibot.
Labi na nga tig-ululan sa karon, madamo sang sarang nga mangin breeding place sang mga lamok.
Naga abiso man siya nga kun naga hilanat kag may mamutikan nga sintoma sang dengue kaangay sang rashes gilayon nga mag pakonsulta sa duktor.