Pasado las siyete sang kagab-i ini ang sitwasyon sa pila ka mga gas stations sa Bacolod City. May mga gas stations nga naga pila ang mga motorista. Ang iban nga mga salakyan naga lab-ot na sa dalan sang hulat sang turno nga makapatughong.
Kaina las sais sang aga ginpatuman ang dako nga saka sa bili sang produkto petrolyo.
Para indi matam-an ang mga nagapatughong, gin utay-utay lang ang pagpatuman sang saka.
Ginkasugtan sang Department of Energy kag sang petroleum companies nga ang tunga lang anay sang saka ang ipatuman kag ang tunga sa Huwebes.
Sa gasolina P1.75 kada litro ang ginpatuman nga saka sang kaina kag 1.75 pa gid sa Huwebes.
Sa Kerosene, P2.40 kada litro ang isaka kag ang dugang pa gid nga P2.40 ang ipatuman sa Huwebes.
Kag sa Diesel naman,P2.60 kada litro ang gindugang kaina sang aga kag may dugang pa gid nga P2.60 sa Huwebes.
Ang dako nga saka sa bili sang produkto petrolyo ang resulta sang gamo sa middle east.