Gindakop sang kapulisan ang ginakabig No. 1 Most Wanted Person sa bilog nga Negros Island Region sa ginpatigayon nga manhunt operation sa Purok Paho, Barangay Rizal sa Silay City, Negros Occidental sang Huwebes.
Ang akusado ginkilala kay alias “Clar,” 43 anyos kag residente sang Barangay Robles sa banwa sang La Castellana, Negros Occidental.
Ang operation ang gin-updan sang Silay City PNP kag Negros Occidental Police Provincial Office pinaagi sa Warrants of Arrest para sa six counts sang Frustrated Murder kag two counts sang Attempted Murder.
Ang akusado kaupod ang isa pa gid ka persona ang gina alegar kaalyado sang isa ka partido kag naka engkwentro nila ang taga pihak man nga partido sadtong election period.
Ang baisay nagresulta sa pagpaniro kung diin duha ka mga persona ang napatay kag walo ang nasamaran.
Tatlo ka mga persona, lakip na si alyas “Clar” kag ang barangay kapitan sang Lantad sa Silay nga si Arnie Benedicto, ang ginpasakaan sang kaso angot sa nagluntad nga shooting incident.
Si Benedicto, nga nagpositibo sa paraffin test kag amo ang ginatudlo nga primary suspect, ang yara sa gihapon sa custody sang Criminal Investigation and Detection Group-NIR.
Ang isa pa gid ka suspect nga si alyas “Joseph”, 32-anyos ang nadakpan naman sadtong Abril kag may piyansa nga P1.44 Million. Siya ang ginakabig no. 2 most wanted sa city level.*
[sibwp_form id=1]