Ginahaylo sang siudad ang mga tenants sa tatlo ka mga mayor nga public markets sa Bacolod City nga ipabilin ang katinlo sang mga merkado.
Ginsiling ni Bacolod City Administrator Atty. Mark Steven Mayo nga may ginadihon na nga ordinansa ang Sanguniang Panlungsod sang siudad agud maplastar ang mga pagsulundan kon sin-o nga mga tenants ang nagakaangay nga hatagan sang award sang pwesto sa merkado.
Lakip na sa mga posible nga ma-qualify sa transfer of ownership amo ang mga tenant nga nagasunod sa mando sang siudad nga ipabilin ang katinlo sang merkado.
Dugang pa ni Mayo, duha ka beses sa kada bulan nagapatigayon sang flushing ang siudad sa Libertad, Burgos kag Central Market. Apang indi ini makasarang nga ipabilin ang katinlo kon wala sang kooperasyon sang mga tenants.
Damlag pa, ginsiling man ni Levy Pangue, pamuno sang City Legal Office Enforcement Team nga may mga tenants sa Libertad Market nga ginahimo na hiligdaan ang sulod sang merkado.
Dugang niya, kinahanglan nga tinlo ang merkado bangud kalabanan sa mga baligya diri, mga pagkaon.*
[sibwp_form id=1]