Gin-arado sang Toyota Raize nga subcompact SUV ang tatlo ka mga tricycle nga naka park sa higad sang national highway nga sakop sang Purok Kalingling, Barangay 1 sa siudad sang San Carlos, kaina, Martes sang aga.
Nagdiretso sa kampo kag natumba ang SUV. Nakaangkon sang mga gasgas ang 18-anyos nga driver, nga ginkilala lamang bilang si alyas Earl, residente sang Calatrava.
Nagagwa sa imbestigasyon sang San Carlos Police Station nga napiyungan si Earl rason nga nadulaan siya sang control sa manubela.
Ginsiling ni Police Captain Rodney Sarona, deputy chief sang San Carlos PNP, gindul-ong sang driver sa eskwelahan ang iya duha ka mga utod nga naga-edad 14 kag 6 anyos kag pabalik na kuntani padulong Calatrava sang magluntad ang insidente.
Pagasabton sang driver ang tanan nga gasto sa pagpakay-o sang mga nagkalaguba nga tricycle.
“According sa driver, medyo kulang siya sa tulog amo siguro ang rason nga medyo napiyungan siya. Maayo na lang kay wala major injuries nga na-sustain sa iya. Ang salakyan may mga damage. Pabalik na tani siya sa Calatrava, pag-abot sa Kalingling Bridge, napiyungan siya amo nga nadulaan siya control sa iya salakyan amo to na-araro niya ang nakapark nga mga tricycle. Initially, nag-agreement sila nga siya na lang mapakay-o sang mga na-damage”, suno kay Sarona.