Mga sidewalk vendors kag tenants sa Manokan Country ang ginaplano nga isaylo sang siudad sa paga arkilahan nga duta sa likod sang Bacolod City Government Center.
Nakigsapul na ang katapo sang Committee on Market sang konseho sa mga sidewalk vendors sa palibot sang Bacolod City Government Center angut sa plano ni Mayor Albee Benitez nga isaylo sila sa paga-arkilahan nga duta sang siudad sa pamilya Gonzaga.
Ang duta ang yara lang sa likod sang BCGC. Pero suno kay Councilor Celia Flor, may renta nga pagabayaran ang mga vendors. Ilakip sang siudad sa arkilahan nga duta ang mga tenants sang Manokan Country nga luyag magsaylo sa baylo nga sa temporary facility nga gintanyag sang SM Prime Holdings Incorporated.
Dugang pa ni Flor nga sa karon padayon ang negosasyon sa tunga sang alkalde kag pamilya Gonzaga nga amo man ang nag-donate sang duta nga natukuran sang BCGC.
Plano sang siudad nga magtukod sang pasilidad para sa mga vendors kag tenants.
Kabahin ini sa mga tikang agud mapaiway ang pag-gutok sang trapiko sa palibot sang BCGC ilabi na kun gab-i.
Luyag man sang alkalde nga mas mapalapnag pa ang Manokan nga kabahin na sang mga atraksyon sa siudad.