Mga mananagat sa Dumaguete nag patigayon sang fluvial parade bilang pagpakita sang ila pag protesta sa reclamation project sang siyudad.
Kapin 50 ka mananagat nga sakay sa 30 ka mga pumpboat sa Dumaguete City ang nag parada gikan sa Siliman beach sa Bantayan tubtob sa Banilad sang sabado bilang pag protesta sa “smart city” reclamation project sang siyudad.
May mga placard pa nga dala ang mga mananagat nga naga panawagan nga protektahan ang kadagatan sa siyudad kag indi pag dayunon ang smart city nga proyekto.
Ang proyekto ang maga himo sang bahin sang coastline sang Dumaguete bilang isa ka “smarty city” kag ini ang gina balabagan sang nagkalain lain nga grupo bangud sang epekto sa marine life kag amo man sa pangabuhian sang mga magagmay nga mananagat.
Sang Biyernes liwat man nga nag patigayon sang silent protest sa Rizal Boulevard ang nag kalain lain nga grupo bilang pag pamatok man sa reclamation project. Plano sang grupo nga mag patigayon sang protesta kada Biyernes tubtob ma untat ang pag duso sang proyekto.
Pero sa tunga sang mga pag pamalabag, padayon sa gihapon ang pag patigayon sang Dumaguete LGU sa pag panguna ni Mayor Felipe Remollo sang information drive kag consultation sa mga nagkalain lain nga sektor sa siyudad may kaangtanan sa smart city project kag sa benepisyo sini sa mga pumuluyo sang siyudad.