Ginpangamuyu-an kag ginbendisyunan anay ang tatlo ka mga kalabera sang tawo antes ginhatagaan sang disente nga lubong sa Granada Public Cemetery sa Barangay Granada, Bacolod City, sang Miyerkules.
Ang tatlo ka mga kalabera sang tawo ang nasapwan sa kampo sa Hacienda Garcia, Purok 9 sa Brgy. Alangilan.
Suno kay Captain Hazel Oropel, hepe sang Police Station 5, antes ginlubong ang mga kalabera, na-secure na sang kapulisan ang mga dokumento kag napaidalum naman ang mga human remains sa DNA testing.
Pananglitan nga may pamilya nga mag-claim sa ulihi, suno sa hepe, bukas ang Police Station 5 kag maga-assist ang ila investigator sa pag-extract sang DNA sample para ikumpara sa DNA records sang mga kalabera nga yara sa Regional Forensic Unit sa Cebu City.
Suno kay Oropel, kung may claimant nga mag-match sa DNA sample, nakadepende sa ila kung luyag nila nga iga-proseso kag iga-exhume ang kalabera.