Ginpangita sang Department of Social Services and Development sang Bacolod City ang tatlo ka mga menor de edad nga gina-alegar nagapanghaboy sang bato sa dalan Lacson.
Sandig sa mga reklamo nga gindulog sa DSSD, ang mga menor de edad ang naga istar sa babaw sang waiting shed sa atubang sang isa ka hotel sa Lacson Street.
Ginsiling ni Anjanette Servano, pamuno sang DSSD Anti-Mendicancy Division sarang nga ipahamtang sa government facility ang tatlo ka mga kabataan kun mapamatud-an nga wala sang ikasarang ang ila ginikanan sa pag atipan sa ila.
Ginklaro man niya nga base sa panaysayon sang kabataan indi matuod nga nagapanghaboy sila sang bato. May isa kuno ka persona nga legal na ang pang edaron nga naga upod sa ila nga amo ang naga panghaboy.
Matapos nga gin-istorya sang DSSD ang mga bata, nahibaluan nga sila ang kaupod sa mga 15 ka “rugby boys” nga una na nga gin rescue sang gobyerno sa plaza.
Apang, suno kay Servano, matapos nga ginpang-uli na sa ginikanan ang amo nga mga bata, nagbalik naman ang mga ini sa kilid sang dalan.
Gin-balik liwat ang tatlo ka mga bata sa ila ginikanan, matapos nga nagwaras bangud wala pa sila sang kalan-on.
Suno sa DSSD, indi nila pwedi nga i-hold ang mga kabataan bangud may ginikanan sila. *
[sibwp_form id=1]