Ginlibot na kag gin-inspect sang Sanguniang Panlungsod sang Bacolod City ang tanan nga mga proyekto nga ginpatukod sa idalum sang administrasyon ni anay Mayor Evelio Leonardia kag anay Mayor Alfredo Abelardo Benitez.
Ginsiling ni Councilor Al Espino nga lakip sa mga gin-inspect sang SP amo ang 8.7 hectare nga tree and ecopark sa Barangay Alangilan nga yara na sa karun sa 80 percent ang completion rate.
Nagpadulong man ang SP sa old city hall, legislative building, museum, kag ang Masskara Collisuem nga ginapaabot mahuman antes paman ang Batang Pinoy 2026 sa Disyembre.
Ini matapos nga nagpasa sang isa ka resolusyon ang SP nga magpatigayon sang comprehensive review sa masobra 5 billion pesos nga gin-loan sang siudad sa Development Bank of the Philippines ukon DBP sa idalum sang nasambit nga mga administrasyon.
Sa idalum sang sini nga resolusyon, ginmandu sang SP nga ipang verify ang total amount sang tanan nga mga proyekto kag i-inspect ang physical status sang tanan nga mga buildings nga ginpatukod gamit ang kwarta nga ginloan sa bangko.
Dugang ni Espino, ang paglibot sa tanan nga proyekto ang kabahin sa pagpasiguro sang SP sa publiko nga nagabantay sila sa tanan nga lihok sang siudad.
Matapos nga nalibot ang tanan nga mga proyekto, iga-present sang tatlo ka komitiba nga kabahin sang inspection team ang resulta sa SP.
“Once and for all, amo na nga nag-upod kita sa pagpasa sang resolusyon to come up with a three-committee special task force para gid ang certain, mabal-an gid naton kun ano gid ang kamatuoran kag indi pang haka-haka, indi lang istorya, indi fake news, indi politika ang masabat”, suno kay Espino.
[sibwp_form id=1]