Mga biktima sang sunog sa Bacolod nagbaton sang ayuda

Nakabaton sang bulig-pinansyal ang 117 ka mga pamilya nga naapektuhan sang separado nga insidente sang sunog sa siudad sang Bacolod. Ginpatigayon ang payout sa Bacolod City College Activity Center kaina sang aga.

Suno kay Bacolod City Mayor Greg Gasataya, natapos na sang Biyernes ang pagproseso sang mga dokumento sang mga benepisyaryo, nga gin-gastuhan gikan sa pondo sang siudad.

Suno sa alkalde, ginhatagan sang tig 15,000 pesos ang mga pamilya nga totally destroyed ang ila mga balay bangud sang sunog, samtang 10,000 pesos naman ang nabaton sang mga partially damaged ang balay. Ang mga renter kag sharer ang gin hatagan man sang tig 5,000 pesos.

Dugang ni Gasataya nga personal niya nga naistorya ang pila sa mga biktima sang sunog kag gin-present ang posible nga relocation site kag pabor man sila diri.

Sa record sang DSSD, 62 ka pamilya ang gikan sa Barangay 10, 19 sa Banago, 18 sa Barangay 26, 11 sa Singcang-Airport, 5 sa Bata, kag 2 sa barangay Alijis ang nagbaton sang ayuda.

Ginpamanduan man sang alkalde ang Bacolod Housing Authority nga padasigon ang pag-develop sang mga duta sang LGU bilang relocation sites para sa mga biktima sang sunog kag mga informal settler families nga yara sa delikado nga mga lugar.

[sibwp_form id=1]