Mga kabarangayan ginahaylo sang siudad nga painon ang tanan nga recyclable plastic waste sugod Mayo 1.
Lapit sa 27 percent sang residual waste sang Bacolod mga plastic nga masami kabangdanan kun ngaa nagadamo ang natambak nga basura sa landfill sa Barangay Felisa.
Pero sa pagsugod sang panibag-o nga kontrata sang IPM-CDC, tuyo sang Department of Public Services nga mabuhinan ang kadamuon sang residual waste pinaagi man sa pag-segregate sang recyclable plastic materials.
Suno kay Ramel Palalon, pamuno sang DPS, duha ka beses sa isa ka bulan ang natalana nga schedule sang garbage collector para manghakot sang tanan nga sahi sang recyclable plastic waste.
Gani ila ginahaylo ang mga kabarangayan nga suguran ang pagpatuman sang waste segregation agud to nga mas masulhay ang hakutay sang basura.
Ginpahayag man ni Palalon nga humalin sang nagligad nga Disyembre may dako nga pagnubo sa kadamuon sang nabaton nila nga mga reklamu may kaangtanan sa basura.
Nangin dako nga bulig sa waste collection sang siudad ang zonal schedule sa paghakot sang basura kag ang tracking system nga ginpatuman sang IPM-CDC agud mabuhinan ang backlog sa basura.