May mga 20,000 ka botante ang iga de-activate sang COMELEC sa Bacolod City.
Suno kay Bacolod Election Officer Atty. Kathrina Trinio-Caña, ang ini nga mga botante sa Bacolod City ang i-deactivate sang COMELEC bangud sang kapaslawan nga makaboto sa duha ka sunod-sunod nga pinili-ay.
Kabahin man sa iga-deactivate ang mga botante nga napamatud-an nga nagkalamatay na, base sa nagapadayon nga Election Registration Board hearing.
Ginpahayag niya nga sarang makapa-reactivate sang voter status ang mga apektado paagi sa nagapadayon nga registration.
Magapadala man sang notice ang Comelec kag magapost sang listahan sang mga deactivated voters sa tagsa ka barangay.
Padayon ang ERB hearing tubtob Enero 23 para sa 9,500 ka mga aplikante nga nagparehistro halin Oktubre tubtob Disyembre 2025.
Padayon man ang registration sa Ayala Malls Capitol Central tubtob Enero 23, samtang magabalik ang Comelec sa BAYS Center sa Enero 26 tubtob 28, kag sa Ayala Malls sa Enero 29 kag 30, 2026.*