Nagpanindugan si Bacolod City Mayor Greg Gasataya nga indi niya pagbatunon ang pagturn-over sang na rehabilitate nga Bacolod City Public Plaza gikan sa Tourism Infrastructure and Enterprise Zone Authority.
Ini matapos nga personal nga ginkadtoan sang alkalde ang plaza kagab-i kag nagpabutyag sang iya pagkadismaya sa nagapadayon nga rehabilitation sang TIEZA.
Ginsiling ni Gasataya nga masubo kun lantawon ang plaza sa karun, ilabi na nga magasugod na ang selebrasyon sang ika-47 nga MassKara Festival sa Hwebes.
Dugang niya, manami man ang mga suga nga ginpamutang, apang halos wala na sang mga hilamon ang palibot bangud wala sang landscaping.
Suno naman sa TIEZA, wala madala sa program of works ang landscaping sa plaza.
Sa tunga sang plaza may ginbutang nga mini fountain, apang ginmanduan sang alkalde nga indi ini pagpaandaron bangud nagadanaw ang palibot kay wala sang insakto nga drainage system ang fountain.
Isa pagid sa ginakadismaya sang alkalde amo nga long overdue na ang proyekto. Sang tinalikdan pa nga MassKara Festival kuntani ini natapos, apang nagpangayo sang extension ang TIEZA kag nagsaad nga sini dapat nga Setyembre nahuman na ini.
Apang tubtob sa karun, may nagapadayon pa nga rehabilitation sa sulod sang plaza.
Apisar nga wala pa maturn-over sa siudad ang proyekto, pagagamiton na ini para sa mga sectoral events sang MassKara.
80 million pesos ang budget nga ginpain sang TIEZA para sa pagkaayo sang plaza.
Sa pagbukas sang MassKara bwas nga adlaw, ginahagda sang alkalde ang pamunuan sang TIEZA nga magkadto sa plaza agud makita ang kahimtangan sang ila gin-obra.
[sibwp_form id=1]