Ginmeeting ni Pontevedra Mayor Jose Maria Alonso ang mga beach resort owners sa banwa para ayuon nga limitahan lang anay ang mga tawo nga pasudlon sa mga beach resort.
Kinaangdan na abe sang ila nga mga pumuluyo pati na sang mga kaiping nga mga banwa kag siudad nga magpadulong sa baybay kada Enero uno. Suno sa alkalde, indi dapat pagkalipatan nga may COVID-19 pa sa gihapon nga balatian.
Dugang pa niya bisan indi na amo sina kadamo ang kaso sang COVID-19 sa ila nga banwa indi sa gihapon dapat nga magkumpyansa. Pati ang mga department heads nila ang ginpatambong man sa meeting nga ginpatawag.
Samtang ang PNP ang masako naman sa pag paandam sa publiko nga indi lang mag gamit sang mga palupok sa pag sug-alaw sang bag-ong tuig.
Wala sang fire cracker related incident ang pontevedra sang nagligad nga tuig gani luyag nila nga magapadayon ini sa sini nga tuig.
Dugang pa ni SSg Liezel Mapa, PCR-PNCO, Pontevedra PNP, bisan natabo kahapon ang pagpatay sa isa nila ka kaupod nga pulis kinahanglan nila nga mag padayon sa ila nga mano-mano nga information campaign sa mga barangay ilabi na sa mga nabukid nga bahin sang banwa kay indi tanan may access sa social media kag internet.