Mayor Albee wala nagpirma sa IRR sang NIR tungod sang pagkakas sang probisyon angut sa pag-establish sang satellite offices.
Sang Oktubre 3 opisyal nga ginpirmahan nanday Negros Occidental Governor Jose Eugenio Lacson kag Negros Oriental Governor Manuel “Chaco” Sagarbarria ang Implementing Rules and Regulation para sa Negros Island Region.
Kabahin sa mga signatories sanday Bacolod City Mayor Albee Benitez nga nagatiglawas sa highly urbanized city.
Pero ginsiling sang alkalde nga wala siya nagpirma bangud wala nalakip sa provision sang IRR ang pag-establish sang mga sub-regional satellite offices sa mga probinsya nalakip diri ang para sa probinsya sang Siquijor.
Ginpaathag sang alkalde nga ini ang nakasugtan sa ginpatigayon nga pagsinapol sang katapo sang technical working group.
Ginalauman kuntani sang alkalde nga mangin isa ka model region ang NIR nga ang mga department kag agency ang may kapasidad mag-transaction paagi sa modern technology nga indi na kinahanglan mag-gasto sang dako sa infrastructure kag iban pa nga logistics.
Nagpasalig nga bisan pa makabig operational na ang NIR magapadayon siya nga magaduso para matigayon ang pag-establish sang mga satellite offices agud mas mangin mahapos para sa mga residente sang tatlo ka probinsya.