Mayor Albee Benitez nagmando sa kapulisan nga mas pabaskugon pa ang monitoring kag seguridad samtang nagahilapit ang Masskara Festival.
Kapin sa P3.7M ang balor sang ginasuspetsuhan shabu nga na rekober sang kapulisan sa separado nga anti drug operation sa Barangay Tangub kag Singcang-Airport sa Bacolod sang weekend.
Naga-gwa sa pagpang-usisa sang pamunuan sang Bacolod City Police Office nga ang supply sang iligal nga droga ang mahimo ginhanda para sa nagahilapit nga Masskara Festival.
Dungan sini ang asud-asud nga kaso sang pagpangawat sa siudad.
Gani inmanduan ni Mayor Albee Benitez si BCPO Director Col. Joeresty Coronica nga pabaskugon pa ang monitoring kag ang seguridad batuk sa nagaluntad nga kriminalidad, ilabi na ang pagbantay sa mga pangayaw nga nagapasulod sang iligal nga droga.
Sa pagsapol sang alkalde kag Coronica nakasugtan ang pagtalana sang P20,000 tubtob P50,000 nga reward money sa mga indibiwal nga makabulig sa pagsolbar sang mga nagaluntad nga krimen sa siudad.