Digicast Negros

Mayor Albee Benitez: Mga mabakante nga stalls sa Manokan Country ipa rentahan sa iban

Sorry na lang ang nangin pahayag ni Mayor Albee Benitez sa mga tenants nga sarang mapahalin sa ila mga pwesto sa Manokan Country kun mapaslawan sila nga mabayaran ang ila utang sa siudad.

Kutob Setyembre 30 ang ginhatag nga deadline sang siudad para sa 17 sa 22 ka mga stall owners agud nga ma-settle ang nabilin nga masobra 7.7 milyones pesos nga utang.

Sa final notice nga ginpapanaug sang City Legal Office nakasaad nga sarang mapahalin sa ila pwesto ang mga stall owners nga indi makabayad sang ila utang.

Ginsiling sang alkalde nga ila ipa rentahan sa iban nga interesado ang mabakante nga stall sa Manokan Country.

Si David Montoya,presidente sang Manokan Country Vendors Association liwat nga maga ayo sa siudad nga matagaan sila sang dugang nga panahon para mabayaran ang ila utang sa natalana nila nga pagsinapol upod sa Committee on Markets and Slaughterhouse nga ginapangunahan ni Councilor Celia Flor bwas.

Ginalauman nila nga ma-condone pati ang penalties sa ila utang nga tinuig man nga wala nabayaran sa siudad.

Exit mobile version
Skip to toolbar