Pagsaka sa suspected leptospirosis cases sa Negros Occidental ang na-record kasunod sang nagluntad nga pagbaha dala sang Bagyo Tino.
Apat naman ang suspected leptospirosis deaths.
Sa datus sang Provincial Health Office, humalin sang November 4, sang mag-igo ang bagyo Tino, tubtob karon may yara sang 90 ka suspected cases ang na-record gikan sa mga ospital kag report sang LGU.
72 diri ang na expose sa pagbaha suno sa PHO.
Ginsiling ni Dr Girlie Pinongan, Provincial Health Officer, mahimo nga magasaka pa ang kadamuon bangud wala pa nagsulod ang report sang iban nga ospital kasubong man sang iban nga LGU.
Ang 90 nagatumod sa mga na-ospital, wala pa diri suno kay Pinongan ang wala ma-ospital.
Nagalawig sa 5 to 14 days ang incubation period sang leptospirosis, rason nga subong pa lamang nag ginuwa ang mga suspected lepstospirosis cases.
Suno kay Dr Nikka Hao ang Regional Director sang Department of Health NIR may mga parameters nga gina basehan antes maka siling nga may yara sang outbreak. Gani indi pa sila makasiling kun may outbreak.
Ginsiling naman ni Pinongan nga sa karon padayon pa ang ila nga pag pangusisa sa sining mga kaso. Ila man ginkasugtan nga ang mangin basehan nila ang mga clinical signs and symptoms na lamang sa pag pat-od sang mga kaso.
Naga abiso ang PHO nga sa mga makitaan sang sintoma kaangay sang paghilanat, palanakit sang kalawasan, pag pula sang mata kag iban pa, mag pa konsulta.
Pero gina sulit man sang PHO nga kun naka ubog gid man sa tubig baha, para malikawan na ang leptospirosis nga makuha gikan sa higko sang ilaga kag iban nga kasapatan, mag padulong na nga daan sa health center para madapatan sang profilaxis.*