Kumpleto na ang tanan nga mga dokumento sang Bacolod City para sa localized nga emergency 911 system.
Ginsiling ni Bacolod City Mayor Greg Gasataya, nga nagahulat nalang sila sang Notice of Activation of Local Call Center ukon GO-LIVE agud tigayon na nga mapatuman ang amo nga proyekto.
Kun may localized nga 911 sa Bacolod, mangin mas madasig na ang pag responde sang kapulisan kag rescuers sa mga insidente bangud ang tawag sang isa ka caller, ang maga diretso na sa command center sang Bacolod City kag indi na magdangat pa sa nasyonal.
Dugang ni Gasataya, temporaryo nga ibutang ang call center sang 911 sa Evacuation Center sa Barangay Taculing kag isaylo ini kon mahuman na ang ginapatukod nga Command Center sa amo man nga Barangay.
Samtang, igalunsar sang Bacolod City Police Office ang SAFE NIR DIAL 911 Caravan sa Huwebes nga adlaw agud mapatpat sa pumuluyo kon ano ang 911.
Ginsiling ni BCPO Director Police Colonel Eugene Rebadomia, madamo sa mga Bacolodnon ang wala nagatawag sa 911 apang naga post sa Facebook, rason nga indi nila ma respondehan ang mga insidente bangud wala sang formal complaint.
Magalibot sa Huwebes ang BCPO sa bug-os nga siudad para sa nasambit nga Caravan.*
[sibwp_form id=1]