La Castellana DRRM photo
Ginpasaka na ang alert status sang Negros Occidental Provincial Disaster Risk Reduction and Management Council Emergency Operations Center (PDRRMC EOC) sa blue angut sa ginapaabot mabunok nga ulan dala sang Southwest Monsoon nga gin pabaskog sang Tropical Cyclone “Inday”.
Pagtupa sang ulan ang padayon nga gina handaan. Mga local government units gina abisuhan nga indi lamang ang mga coastal areas ang dapat nga bantayan.
Sa banwa sang La Castellana, may 16 ka pamilya ang gin-evacuate kaagahon sang Hulyo 8, sa Brgy Robles bangud sang pag baha dala sang mabunok nga ulan. Sila ang tigayon na nga naka pauli.
Sa Pontevedra naman may lima ka mga pamilya ang gin-evacuate man bangud sang pag baha kag tubtob sa karon naga pabilin pa sa evacuation center suno sa Provincial Disaster Risk Reduction Management Office.
Sa Canlaon City may 57 ka pamilya ang gin-evacuate man bangud sang mabunok nga ulan sa datus sang Office of the Civil Defense.
Ginsiling ni OCD Regional Director Donato Sermeno, III padayon ang ila nga coordination sa mga local government units labi na nga yara ang Negros sa Yellow Rainfall Warning.
“Sa subong ga maintain kita sang red alert kay tungod sang Kanlaon. So maintain lang man kita gihapon. Balantayan naton ang La Castellana basi mag lahar”, suno kay Sermeno.
Suno kay Irene Bel Ploteña ang PDRRM head sang Negros Occidental, ang central kag southern Negros ang ginapaabot nga maga eksperiensya sang pag-ulan humalin karon sa gab-i tubtob sa Biyernes, rason nga balantayan ang pag baha.
Naka preposition na ang mga goods kag mga rescue teams suno kay Ploteña.
Base sa eksperiensya sang probinsya ang tubig baha indi lamang sa mga coastal areas kundi pati man sa mga naibabaw nga bahin gani ang mga LGU dapat nga mag bantay gid.
Yara na sa tagsa ka LGU ang mag patuman sang pre-emptive evacuation.
“Kun sige-sige siya (ulan) for two days of course ma expect gid kita pagbaha sa mga areas. Not only sa coastal area, but based sa aton nga recent nga history makita ta nga kalabanan sang aton nga baha is ara sa babaw and kalabanan sa aton nga deaths ara sa babaw. Kaina gin-remind ta ang aton nga mga LGUs to make sure nga indi lang sa coastal areas ang bantayan but also particularly sa upland areas nila”, suno kay Ploteña.
As of press time may 12 ka mga LGU sa Negros Occidental nga nag suspend kag maga suspend sang klase bangud sang pag-ulan.
Ang Negros Oriental naman ang nag suspend na sang klase sa bilog nga probinsya para bwas nga adlaw, Hulyo 9.
[sibwp_form id=1]