Gin-anunsyo sang tatlo ka mga head organizers nga sanday Memai Arban para sa PWD Day, Joann Visitacion para sa Women’s Day kag Lizette Sy para sa Kids Day Out upod kay Festival Director nga si Rodney Ascalon, nga ang MassKara Festival subong nga tuig indi lang selebrasyon sang kalipay kag kolor, kundi isa ka daku nga pasidungog sa pagkaupod sang tanan nga sektor kag komunidad.
Sa Oktubre 4, pagahiwaton ang Kiddieverse sa Bacolod City Government Center Grounds, kun sa diin magatipon ang 1,500 ka day care children para sa isa ka Disney-inspired nga adlaw. May mga mascots, live performances kag mga hilikuton nga magahatag sang kalingawan sa mga kabataan.
Oktubre 5, ang spotlight ipasentro naman sa kababainhan paagi sa Zumdigras 2025. May Zumba showdown kag pagpili sang Zumdigras Queen halin sa 15 ka barangay. Kabahin man sini ang wellness services kag give aways para sa mga participants.
Sa Oktubre 7, ang mga PWDs naman ang pagahatagan importansya sa aktibidad nga PuWeDe G!, nga pagahiwaton sa Ayala Malls Capitol Central. Ipakita diri ang talento sang mga PWDs, kag may product fair, magic show kag gift-giving para sa mga kabataan nga may special needs.
Suno pa kay Rodney Ascalon, Festival Director, ang mga hilikuton indi lang basta kompetisyon kundi selebrasyon sang pagrespeto, pagkilala kag pagpalangga sa tagsa ka miyembro sang komunidad.