Naka-record sang 44.18% nga pagsaka sa collection ang Bacolod City Government sa nahauna nga semana sang Business One-Stop Shop, kun ikumpara sa kapareho nga period sang nagligad nga tuig.
Suno kay Mayor Greg Gasataya, bisan pa may temporaryo nga problema sa server sa una nga duha ka-adlaw sang operasyon sang BOSS, ini gilayon man nga nasolbar bangud sa kooperasyon sang tanan. Wala ini nakaapekto sa padayon nga pagtaas sang collection sang siudad.
Ginpasalamatan man ni Gasataya ang mga pumuluyo kag business owners nga padayon naga-salig sa lokal nga gobyerno, bangud daku ang ila kontribusyon sa pagpadalagan sang ekonomiya sang Bacolod.
Ginpalawig naman tubtob sa Marso 31, 2026 ang operation sang Business One-Stop Shop sa Bacolod.*