Sa Lunes na maga bukas ang mga pavilion para sa MassKara sa Panaad.
Isa ka programa ang natalana sa pagbukas sini, kag sa karon padayon pa ang Inter-Agency MassKara sa Panaad meeting sa pagpaseguro nga mangin sulhay ang tanan.
Suno kay Provincial Administrator Rayfrando Diaz, kasubong nga daw warm-up para sa Panaad sa Negros Festival ang ginapaabot. Magluwas sa pagkaon kag iban pa nga mga ginatanyag sa tagsa ka LGU booth, may mga festival dances kag iban pa nga entertianment ang sarang masaksihan sang mga maga bisita.
Halos tanan nga banwa kag siudad ang maga pakig bahin lakip na ang Bacolod City. Tubtob Oktubre 16, ang MassKara sa Panaad.
Ang tagsa ka adlaw na assign sa tagsa ka distrito kag suno kay Diaz, ginalauman nga yara man ang tagsa ka District Representative para mag suporta sini.
May 100,000 pesos nga assistance ang probinsya para sa mga magapakigbahin nga LGU kag ini ang iga release sa tion nga may nagakaigo na sila nga dokumento nga ma submit.