163 ka persona ang pre-emptive nga gin-evacuate sa La Castellana kag Canlaon City bangud sang mabunok nga ulan.
Sa La Castellana, ang mabunok nga ulan nagtuga sang muddy stream flow.
Ini ang sitwasyon sang Ibid Creek sa Sitio Tamburong sa Brgy Biaknabato 5:40 sang hapon sang Setyembre 15, sa kuha ni Kagawad Allan Tomaquin. Suno kay Tomaquin nagsugod ang pag ulan mga la una sang hapon sang Martes.
27 ka pamilya ukon 92 ka persona ang ila nga gin pre-emptive evacuate sa daan nga barangay hall kag day care center. Temporaryo sila nga gin papauli pero sini nga gab-i sila ang maga balik sa evacuation center suno kay Tomaquin.
Sini nga Miyerkules sang hapon liwat naman nga nag-awas ang creek suno sa kagawad.
Suno kay Mayor Añejo Nicor may report man sila nga nabaton nga na-usmod ang Calapnagan bridge tungod man sang muddy stream flow, pero as of press time wala pa sila sang pat-od nga detalye. Ini ang ginkadtuan na sang ila nga Disaster Team.
“Kabay nga mag ulu-aligmat kita. Whatever nga mag abot sa low pressure naton, sa mga higad sa suba, gina pangabay ko gid nga automatic mag tawag kamo sa aton nga hotline, sa aton mga barangay official, sa aton nga punong barangay, para nga ma likawan naton ang mga casualty sa amo sina nga mga low pressure naton”, suno kay Nicor.
Sa Canlaon City ginpatuman man ang pre-emptive evacuation sa 24 ka pamilya ukon 71 ka persona. Wala sang pag overflow sa mga suba suno sa Office of the Civil Defense. Tigayon na nga naka pauli ang mga evacuees.
[sibwp_form id=1]