Masobra 500 ka mga katapo sang transport group maga biyahe sa LTFRB Regional Office sa Iloilo para sa application sang extended provisional authority sang mga traditional jeepneys sa Bacolod.
Dala ang endorsement halin sa siudad magabyahe bwas pa Iloilo ang tiglawas sang Sentrong Samahan ng mga Tsuper at Operators Negros ukon SSTONE kag Federation of Bacolod City Drivers Association ukon FEBACDA agud mapa-aprobahan sa Land Transportation Franchising and Regulatory Board Regional Office 6 ang masobra 500 ka mga applications para sa extension sang provisional authority sang traditional jeepneys tubtob Disyembre 31.
Kabahin sila sang 1,898 ka mga na validate na nga application nga natagaan sang endorsement pinaagi sa City Administrator’s Office.
Suno kay Jun Asis, secretary general sang SSTONE, ginalauman nila nga mangin madasig ang pagkuha nila sang PA ilabi na nga ini ang nangin pasalig sang pamunuan sang LTFRB sa pagsinapol upod sa Department of Transportation kag Bacolod LGU.
Gindugang ni Asis nga wala sila nagapanukot sa mga driver/operators para sa pag proseso sang PA taliw-as sa mga akusasyon sang ila mga kaupdanan sa transport sector.
Ginsiling naman ni Councilor Al Victor Espino nga nagapabilin nga bukas ang siudad sa pagbaton sang application kag paghatag sang endorsement sa iban pa nga transport group ilabi na sa mga yadtong nag transport strike sang nagligad nga semana.