Masobra 30 ka empleyado sang Civil Registrar’s Office magapaidalom sa training kag seminar sa Sabado matapos sang napalab-ot nga reklamo sa nag sinuplado nga empleyado.
Sa Sabado suguran sang Human Resource Management Services Office ang training program sa 30 ka mga empleyado, kadam-an diri mga job order workers sa Civil Registrar’s Office kasunod sang mando ni Mayor Albee Benitez. Ini kasunod sang nabaton nga reklamo angut sa nagsinuplado nga employee sa Window 3.
May duha ka babaye nga nagaserbe sa Window 3 nga damlag gin-reassign samtang gina-usisa ang alegasyon sang himata nga nalisdan nga sadto nag proseso sang death certificate sang Nobyembre 3.
Suno sa alkalde, sarang man makabalik ang duha ka mga empleyada sa pwesto kun matapos na ang pagpang-usisa.
Nagahulat naman ang pamuno sang Civil Registrar’s Office nga si Atty. Hermilo Pauyon nga makapakig-angut sa ila ang tagreklamo agud tigayon nila nga maaksyunan ang reklamo.
Magluwas sa pag-install sang dugang nga CCTV sa opisina,paga islan man sang siudad ang mga gubaon nga mikropono sa mga transaction window.