Bangud sa indi pag-intiendihanay, na utod ang ulo sang mangunguma matapos ginlabo sang iya man lang bayaw sa Purok Tamlang, Barangay Camingawan sa Kabankalan City, Martes nga adlaw.
Sa imbestigasyon sang Kabankalan PNP, updanay nga nag-ani kag nag-thresher sang humay ang 42-anyos nga biktima kag ang 28-anyos nga suspek.
Matapos sini, nag-inom-inom ang biktima nga si alyas “Sunny” kag ang suspek nga si alyas “Redman”, kun diin sila ang naglalisay apang gintambagan sang ila mga kaupdanan.
Sang hana na nga maghalin ang biktima, nagdalagan pakadto sa iya ang suspek kag siya ang ginlabo sa ulo kag li-og.
Nag-gwa man sa imbestigasyon nga may pila na ka tini-on sadto nga naga ma-oy ang biktima kag ginahangkat inaway ang suspek, nga iya man lang bayaw.
Gindakup sang pulis ang suspek kag karon detained sa custodial facility sang Kabankalan PNP.