Gindakup sang kapulisan kag ginpasakaan sang kaso nga homicide, Miyerkules nga adlaw, ang isa ka 38-anyos nga mangunguma matapos sini ginlabo-patay ang iya upod sa Barangay Damsite, banwa sang Murcia.
Ginsiling ni Police Captain Honey Labaro, deputy chief sang Murcia PNP, indi pag-intyendihanay ang ginsuguran sang insidente matapos nga ginsaway sang suspek ang biktima nga indi pag-ilawig ang iya karbaw sa bakante nga lote tubtob nga nagbinaisay sila kag ginlabo sang suspek ang biktima gamit ang binangon.
Nakaangkon sang mga pilas sa ulo kag liog ang 55-anyos nga biktima, rason sang iya kamatayon.
Sa pursuit operation sang katapo sang Murcia Police nadakpan ang suspek kag na-recover ang binangon nga gingamit sa krimen.