May malapit sa P5M nga balor sang suspected shabu nakuha sa buy-bust operation sa Bacolod. Isa sa anum ka gindakup, ambulance driver sang Cadiz LGU.
Yara sa P4,760,000 ang kabilugan nga balor sang suspected shabu nga nakumpiskar sang Bacolod City Police Office sa tatlo ka mga drug buy-bust operations, sini nga weekend.
Kaina, Lunes sang kaagahon, nakarekober sang City Drug Enforcement Unit ang P680,000 nga balor sang ginasuspetsuhan shabu gikan sa isa ka driver sang jeep kag manugbaligya isda sa Bangga Vista Alegre, Barangay Mansilingan sa Bacolod.
Antes sini, nakakuha man ang katapo sang CDEU sang kapin 520 grams ukon indi magnubo sa P4 Milyones nga balor sang ginasuspetsuhan shabu gikan sa duha ka mga persona nga ginkilala nga sanday alyas Levi kag alyas Raegil, sa Zone 5, Barangay Handumanan sa syudad sang Bacolod, pasado las 8 sang Domingo sang gab-i.
Matapos ang pila lang ka minutos, nadakpan sang katapo sang Police Station 8 ang isa ka driver sang ambulance kag ang iya nobya sa ginpatigayon nga buy-bust sa Purok Grasya, Barangay Singcang-Airport sa Bacolod.
Ang mga gindakup ginkilala kay alyas Evon kag alyas Riche, pareho nga residente sang Cadiz City. Nakuha sa ila ang P544,000 nga balor sang suspected shabu.
Ginkumpirmar ni Cadiz Mayor Salvador Escalante Jr. nga regular nga empleyado ang status sang ambulance driver, nga madugay na nga naga-obra sa siudad.
Nagpasalamat ang alkalde nga nadakpan ang driver nga madugay na nga ginabantayan sang pulis, pati ang iya nobya, nga nakaagi na dakup bangud sang iligal nga droga kag nakagwa lang matapos maka-avail sang probation.
Suno kay Escalante, nakabaton sila sang madamo nga intel report angut sa babaye, nga ginakabig isa ka high value person, pati na ang driver sang ambulance.
Bangud sang insidente, ginsuspendi na ang ambulance driver samtang padayon pa ang imbestigasyon, kag siya ang posible makakas sa serbisyo kun mapamatud-an sang kapulisan nga may involvement siya sa illegal drug trade.
Antes ang eleksyon, nagpatigayon sang drug test ang Cadiz LGU kag suno sa alkalde, may 21 ka mga job orders ang nagpositibo sa pag-gamit sang iligal nga droga, lakip na ang pila ka mga driver sang siudad.
Ginpangkakas na ang mga imbulbado nga job order employees.
Sang nagpatigayon sang drug test, wala madala ang nadakpan nga ambulance driver bangud posible siya ang on-duty sadto nga tion.
Dugang pa ni Escalante nga magapadayon ang random drug test sa kada department sang Cadiz LGU.