Patay ang mag-live-in partner matapos nga ginpangtiro sa Sitio Calango, Barangay Iglau-an, banwa sang Murcia Sabado sang kaagahon.
Suno kay Police Executive Master Sergeant Benjie Silva, Deputy Chief of Police sang Murcia PNP, ang mga napatay ginkilala nga sanday Feliciano Leagoso, 45 anyos kag Susan Hiliwagan, 57 anyos.
Dugang pa ni Silva, may mga person of interest na sa natabo nga pagpatay apang wala ginhatag ang detalye tungod sa nagapadayon nga imbestigasyon.
May nakuha sa crime scene nga mga bala sang 12 gauge shot gun kag kalibre 45 nga armas.
Naggwa sa inisyal nga imbestigasyon nga away sa ginabantayan nga duta ni Leagoso ang rason sa krimen.
Sa panaysayon sang pamilya sa pulis, antes sang insidente, naistorya na sa ila ni Feliciano ang isyu sa duta tungod gina-claim sang mga gin-alegar nag-squat sa duta nga propedad sang ila nga amo.
Sabado sang aga, may nag report sa PNP nga nasapwan na lamang nga patay si Leagoso malapit sa kudal sang balay kag sang gin usisa, nakit-an man ang bangkay ni Hiliwagan sa sulod sang kamalig nga ila ginatiniran. Nagapadayon ang imbestigasyon sang PNP.