Nadulaan sang preno ang duag green nga Weapon Carrier Truck kag nagdiretso sa isa ka balay kung diin nagatipon-tipon nga nagapaniyaga ang magpamilya sa Purok Super L, Barangay Pandanon sa banwa sang Don Salvador Benedicto, mga las 12:55 sang udto sang Lunes, Mayo 25.
Nawasak ang balay, samtang ginbawian sang kabuhi ang iloy nga si alyas “Judy”, 23-anyos kag ang iya bata nga si alyas “JB”, naga-edad isa ka tuig kag 10 ka bulan. Ang bata ang nalapakan sang guma sang truck.
Sa karon, duha pa ang nagapabilin nga kritikal sa ospital. Sila amo ang ginkilala kay alyas “Larry” kag alyas “Melanie”, 51-anyos, residente sang nasambit nga lugar.
Samtang may anum pa gid ka mga pilason, lakip na ang duha ka mga menor de edad kag apat ka legal aged nga mga indibidwal, pati na ang 58-anyos nga driver sang truck kag duha niya ka mga pasahero.
Ang sakay sang truck ang tanan residente sang Barangay Canlandog sa banwa sang Murcia.
Ginsiling ni Police Lt. Col. Ellendie Rebusquillo, hepe sang DSB PNP, nagapadulhog ang truck sang nag-malfunction ang brake kag nadulaan sang control ang driver.
Suno sa hepe, nag-panic ang driver kag ginpatay sini ang makina agud kuntani nga magdulog ang truck apang amo pa ini ang gintunaan nga makabunggo ang truck sa balay tungod indi niya na malubag ang manibela.
“Subong ginahulat pa namon ang pamilya (kung mapasaka kaso or ma-settle) kay daw indi pa sila ka time, ka kwan sang panahon nila kay struggle pa sila paano nila i-cater ang ila nga himata nga nabiktima nga ara sa ospital kag ang mga napatay,” pahayag ni Rebusquillo.*
Gin-arado sang truck ang balay sa Purok Super L, Barangay Pandanon sa banwa sang Don Salvador Benedicto, kung diin nagresulta sa pagkapatay sang mag-iloy kag pagkasamad sang 8 ka iban pa, lakip na ang mga sakay sang truck.
[sibwp_form id=1]