Maestro sa Binalbagan Catholic College nasapwan nga patay malapit sa iya nga boarding house kag may 16 tanan ka mga buno sa lawas.
Hold-up isa sa mga motibo nga gina lantaw sang pulis.
Las onse sang gab-i, gin-share pa sang manunudlo nga si Tony Lazaga ang isa ka post sang student publication sang Binalbagan Catholic College nga “The Patrician”.
Las tres y medya sang kaagahon nasapwan na lamang ang iya duguon nga bangkay.
16 tanan ka mga buno sa lawas ang na angkon sang maestro sa iya kamot, likod kag abaga sang masapwan pasado las tres sang kaaagahon sa may Dumas St. Brgy. San Pedro sa Binalbagan malapit lang sa iya nga boarding house nga malapit man sa BCC.
Suno kay Police Capt. Glen C Portunes, deputy chief sang Binalbagan Municipal Police Station, may tricycle driver nga nagpabalo sa ila nga may nalabyan ini nga persona nga duguon sa higad sang karsada.
Suno sa PNP gikan sa Bacolod ang maestro kay nag attend sa birthday sang iya abyan kag papauli na kuntani sa iya boarding house sang ginbangaan sang wala pa makilala nga suspek kag ginbuno sang maka pila ka beses.
Dugang pa sang pulis posible ginhulat na ini siya nga daan sang suspek sa gin panaugan nga bangga.
Nadula ang cellphone sang maestro pero wala naman makuha ang iya nga kahita, relo nga yara pa sa iya nga kamot kag laptop. May duguon nga kutsilyo nga nakuha sa crime scene.
Hold-up ang gina lantaw isa sa mga motibo sa krimen. Ginhingaw pa dala infirmary clinic ang biktima apang gindeklarar ini nga dead on arrival.
Suno sa PNP bangud sa kadamo sang na angkon nga buno sa lawas gina lantaw nila nga posible may kainit ang suspek sa biktima.
Hustisya ang panawagan sang pamilya, kaabyanan kag BCC community sa natabo sa manunudlo.
“16 stab wounds. May yara sang gina tawag nga cruelty. Bale kumbaga tama ang siling mo nga may kainit sa iya kun palaliman gid nimo, akig sa iya guro”, suno kay Portunes.