Dala sang mabunok nga ulan, siudad sang San Carlos ang ginbaha nga nag resulta sa pag suspend sang klase sa tanan nga level subong nga adlaw.
Nagsuspend man sang klase ang banwa sang Pulupandan bangud sang malain nga panahon. May pagbaha sa pila ka bahin sang banwa.
Sa San Carlos City may pag baha sa mga población barangays.
Sa post ni Joemil Papa Joms Sabanal kaina sang aga, makit-an ang tubig baha sa dalanon sakop sang National Highway – Locsin St., padulong sa San Carlos Public Transport Terminal kag sa atubang mismo sang isa ka fast food chain.
Ginklaro naman ni Mayor Renato Gustilo nga taliw-as sa nag gwa nga impormasyon wala sang may natabo nga landslide ukon rockslide sa San Carlos. Ang tanan nga dalanon sarang ma agyan.
Ginpakamaayo nga ang bilog nga klase sa siudad ang ginsuspend para man mahatagan higayon ang tanan nga maka bulig sa mga nabahaan.
“May area kita diri sa Palampas nga ga eskwela ang mga estudyante medyo taas-taas ang tubig subong (udto) amo na ang gin suspend naton kay indi sila makatabok. So may certain areas kita sa city medyo nag baha man siya amo nang gin suspend naton para maka bulig-bulig man sila tinlo sa ila balay”, suno kay Gustilo.