Ini ang pahayag ni Bacolod City Mayor Greg Gasataya matapos siya nga makigsapol sa tag-iya sang Crystal Bridges Holding Corporation nga si Lucio Co nga amo na sa karon nag acquire sang PrimeWater.
Sa ila paghinun-anon sang Domingo, naghambal man si Co sa iya nga handa sila mag-invest sa PrimeWater kag Bacolod City Water District agud masolusyonan ang madugay na nga problema sang siudad sa supply sang tubig.
Siling sang alkalde, nagalaum siya nga mapatuman ini sang kompanya ni Co bangud indi na makahulat pa ang pumuluyo sang malawig pa nga tion agud masolusyonan ang problema sa ginakulang nga tubig, ilabi na nga nagahilapit ang tig-ilinit.
Dugang pa sang alkalde, indi na maghilabot pa ang siudad sa agreement sang PrimeWater kag ni Co. Tuyo lamang sang siudad nga proteksyonan ang interes sang pumuluyo kag siguruhon nga masarangan sang Crystal Bridges Holding Corporation nga ma-supplyan sang tubig ang bug-os nga Bacolod, 24/7.
Ang PrimeWater Infrastracture Corporation ang una nga nagadumala sang BACIWA paagi sa isa ka Joint Venture Agreement, apang sang Disyembre nagligad tuig, gin-acquire na sang Lucio Co Group ang kabug-usan sang PrimeWater.*
[sibwp_form id=1]