84-anyos nga lolo sa Sipalay, naiguan sang kilat, patay!
Fatal arrhythmia secondary to a lighting strike ang ginkamatay sang 84 anyos nga tigulang sa Barangay Cabadiangan, siyudad sang Sipalay, Negros Occidental, sadtong Lunes nga adlaw. Ginsiling ni Dionilo Bogtae, DRRMO coordinator sang Sipalay, nga nakaboto pa ang biktima sang aga kag nakapauli sa iya balay. Mga las 12 sang ugto sang nagsugod gal-um kag las 2 sang hapon naman sang nagpangilat. Naga-isahanon ini nga naga-istar sa iya balay kag ginadul-ongan lamang sang pagkaon sang iya mga himata. Sa panaysayon sang pamilya, suno kay Bogtae, nakadul-ong pa sila sang panyaga para sa biktima apang sa ila pagbalik mga las 3 sang hapon, ila na nasapwan nga nagahigda ini sa gwa sang balay. May mga pasu sa butkon, kamot kag likod ang biktima. Suno sa impormasyon, naga kay-o sang hose ang biktima sa gwa sang iya balay. Ginsiling pa ni Bogtae nga masami nga gina-igo sang kilat ang mga lugar sa nabukid nga bahin sang Sipalay, lakip na ang Cabadiangan kag Manlucahoc. Sang tinalikdan nga Abril 2018 sa nasambit nga syudad, anum ang nagkalamatay kag 15 ka iban pa ang pilason matapos ini sila ang maigo sang kilat. Gani nagapangabay ang Sipalay DRRMO sa mga pumuluyo nga kung nagasugod na nga mag-guom-guom, pilion na lamang nga magsulod sa panimalay kag ipalayo ang mga gadgets agud makalikaw sa peligro.