Nakibot na lang ang mga empleyado sng Pesiongs Lechon House sa may Narra Extension sa Bacolod sang naabtan nila sang Domingo sang aga nga guba na ang roll up door kag nahabukay na ang mga pagkabutang sa sulod.
Gin utod ang roll-up door para makasulod ang suspek. Ginkawat ang mga cctv cameras, lpg tank, coffee maker, speakers, electric fan kag pati frozen lechon baboy kag manok wala makaluwas sa mga kawatan.
Nag inum pa sang beer kag nag kaon sang chocolates ang mga suspek. Suno sa tag-iya sang kalan-an, guba ang linya sang internet sa area amo kun ngaa wala nila ma monitor ang natabo sa sulod. Suspetso nila ang mga kawatan man ang nag utod sang linya sang internet. Gina usisa na sang Police Station 4 sa Bacolod ang natabo nga pagpangawat.