Dead on arrival sa ospital ang isa ka 29-anyos nga lalaki matapos ginpulihan buno sang duha ka mga waiter sa sulod sang bar sa Barangay 5, sa San Carlos City sang Lunes nga adlaw.
Naabtan sang mga pulis nga duguon kag naga hapa sa hagdanan sang isa ka bar ang biktima. May tatlo tubtob apat siya ka mga buno sa tiyan.
Ginsiling ni Police Captain Rodney Sarona, deputy chief sang San Carlos PNP, naggwa sa ila imbestigasyon nga naga-obra bilang waiter sa bar ang nagbuno sa biktima.
Naga-tambay ang biktima sa plaza sa atubang sang bar sang may nagluntad nga binaisay sa tunga niya kag sang mga suspek.
Gintawag sang mga suspek ang biktima nga magsulod sa bar kag didto nagluntad ang krimen.
Yara na sa kustodiya sang San Carlos PNP ang duha ka mga suspek nga naga-edad 18 kag 19 anyos.
Suno kay Sarona, subong nga adlaw ipasaka ang kaso nga murder batuk sa duha ka mga suspek.
