Nasapwan kagab-i ang lawas sang 48-anyos nga lalaki nga nahulog sa balsa kag nalumos sa suba nga sakup sang Purok 9, Barangay Poblacion sa banwa sang Cauayan, Negros Occidental.
Sa imbestigasyon sang Cauayan PNP, nagabaligya sang kawayan ang biktima kag ang iya asawa. Masami nga ginahimo nga improvised balsa ang mga kawayan kag ginapaanod ini sa suba agud mahapos na lang nga i-transport.
Lunes sang ugto, nagsakay sa improvised nga balsa ang biktima upod ang iya pakaisa kag tiyo. Ugaling tungod nga mabaskog ang daludo sang tubig, nahulog ang biktima.
Ginsiling ni Lt. Col. Lowell Garinganao, hepe sang Cauayan PNP, wala madeparahan sang iya mga kaupdanan nga nahulog na gali ang biktima kag sang pagbalikid nila, kawayan na lamang ang nagalutaw, kag wala na ang biktima.
Suno sa asawa, indi kabalo maglangoy ang iya bana.
Ginpangita sang mga himata kag residente ang biktima apang sila ang napaslawan.
Makaligad ang pulo ka oras, sa bulig sang Cauayan Rescue Team, nakit-an ang bangkay mga las 10:35 sang gab-i sa idalum sang taytay.
[sibwp_form id=1]